Juda tum se huey hain tou kisi se hum nahi miltay
Koi hum se milay bhi tou khushi se hum nahi miltay
Agar pathar ho tum tou aao betho hum bhi pathar hain
Agar ho admi, tou admi se hum nahi miltay
Hum apni zaat mein sehra hain, sehraon se yaari hai
Kisi darya samandar ya nadi se hum nahi miltay
Humein murda dili tohfe mein tum ne hi tou bheji thi
Gila mat kar jo ab zinda dili se hum nahi miltay
Hamari zindagi hai wo agar uski khushi hai tou
Chalo kuch roz apni zindagi se hum nahi miltay
Faqeeron ko faqeeron ki rafaqat raas aati hai
Sakhi aayen to keh dena sakhi se hum nahi miltay.
